Fatti u ċifri
Min qed jiġi sanzjonat
L-Unjoni Ewropea ssanzjonat aktar minn 1,900 individwu u entità. Dawn jinkludu
- it-tmexxija Russa
- uffiċjali ta’ grad għoli
- staff militari
- kmandanti tal-grupp Wagner
- negozjanti u oligarki prominenti
- propagandisti favur il-Kremlin u kontra l-Ukrajna
- persuni u entitajiet li joperaw fis-settur militari u tal-IT Russu
- orkestraturi tal-hekk imsejħa “elezzjonijiet” illegali reċenti fit-territorji Ukreni li r-Russja okkupat temporanjament
- figuri ewlenin involuti fir-“riedukazzjoni” furzata tat-tfal Ukreni jew id-deportazzjoni illegali ta’ tfal Ukreni lejn ir-Russja
Individwi sanzjonati
- il-kontijiet kollha fil-banek tal-UE huma ffriżati
- ipprojbiti milli jivvjaġġaw fi kwalunkwe post fl-UE
- hu illegali li jiġu pprovduti assi jew fondi mill-UE lil dawn l-individwi
Kumpaniji u organizzazzjonijiet sanzjonati
- il-kontijiet kollha fil-banek tal-UE huma ffriżati
- hu illegali li jiġu pprovduti assi jew fondi, direttament jew indirettament, lilhom
Task Force “Iffriżar u Sekwestru”
Il-Kummissjoni waqqfet it-“Task Force Iffriżar u Sekwestru” biex tesplora r-rabtiet bejn l-assi li jappartjenu għal persuni elenkati taħt is-sanzjonijiet tal-UE u l-attivitajiet kriminali. L-investigazzjonijiet u l-prosekuzzjonijiet huma r-responsabbiltà tal-Istati Membri. L-għan tat-Task Force huwa li ssaħħaħ il-koordinazzjoni fil-livell operazzjonali biex tiżgura infurzar effettiv tas-sanzjonijiet tal-UE fl-Istati Membri kollha.
It-Task Force hi magħmula minn rappreżentanti tal-Kummissjoni, punti ta’ kuntatt minn kull Stat Membru, l-Eurojust u l-Europol. It-Task Force tikkoordina l-ħidma tagħha mat-“Task Force Eliti, Prokuri, u Oligarki Russi (REPO)” stabbilita bejn il-pajjiżi tal-G7, l-Awstralja u l-Unjoni Ewropea.
Kuntratti pubbliċi u finanzjament Ewropew
-
Il-projbizzjoni totali fuq il-parteċipazzjoni ta’ ċittadini u entitajiet Russi f’kuntratti ta’ akkwist fl-UE.
-
Ir-restrizzjoni fuq appoġġ finanzjarju u mhux finanzjarju għal entitajiet li huma ta’ proprjetà pubblika tar-Russja jew ikkontrollati mir-Russja fi programmi tal-UE, tal-Euratom u tal-Istati Membri. Mhu se jiġi konkluż l-ebda kuntratt jew ftehim ġdid ma’ korpi pubbliċi Russi jew entitajiet relatati.
FATT
Il-Kummissjoni temmet il-parteċipazzjoni ta’ korpi pubbliċi Russi jew entitajiet relatati fil-ftehimiet ta’ għotja kollha li għaddejjin, u ssospendiet il-pagamenti relatati kollha sakemm ikun avżat mod ieħor, taħt Orizzont 2020, il-Euratom, u l-Erasmus+.
Għal Orizzont Ewropa (minbarra l-Kunsill Ewropew tar-Riċerka u l-Kunsill Ewropew tal-Innovazzjoni), l-entitajiet ġuridiċi kollha (pubbliċi u privati) stabbiliti fir-Russja, fil-Belarussja jew f’territorji mhux ikkontrollati mill-Gvern tal-Ukrajna mhumiex eliġibbli biex jipparteċipaw. Bħala deroga ġenerali, persuni fiżiċi stabbiliti f’dawk it-territorji xorta jistgħu jipparteċipaw fl-Azzjonijiet Marie Skłodowska-Curie jekk ma jkunux fil-lista ta’ sanzjonijiet.
Media – sanzjonar tal-atturi tad-diżinformazzjoni
Il-mezzi ta’ diżinformazzjoni tal-istat u favur il-Kremlin huma essenzjali u strumentali fl-appoġġ tal-aggressjoni Russa kontra l-Ukrajna. Huma jikkostitwixxu theddida sinifikanti u diretta għall-ordni pubbliku u għas-sigurtà tal-UE. Dan hu għaliex l-UE ddeċidiet li tissanzjona l-assi ta’ diżinformazzjoni u ta’ manipulazzjoni tal-informazzjoni tal-Kremlin.
Hemm sospensjoni fis-seħħ tat-trażmissjoni u d-distribuzzjoni ta’:
- Sputnik u s-sussidjarji, inkluż Sputnik Arabic
- Russia Today u s-sussidjarji, inkluż Russia Today English, Russia Today UK, Russia Today Germany, Russia Today France, Russia Today Spanish, Russia Today Arabic, Russia Today Balkan
- Rossiya RTR/RTR Planeta
- Rossiya 24/Russia 24
- TV Centre International
- NTV/NTV Mir
- Rossiya 1
- REN TV
- Pervyi Kanal
- RIA FAN
- Oriental Review
- Tsargrad
- New Eastern Outlook
- Katehon
Il-liċenzji, l-awtorizzazzjonijiet u l-arranġamenti ta’ distribuzzjoni rilevanti kollha - permezz tal-kejbil, is-satellita, l-IPTV, il-pjattaformi, is-siti web u l-apps - huma sospiżi. Dan jirrigwarda wkoll ix-xandir lejn pajjiżi terzi.
Ir-reklamar ta’ prodotti jew servizzi fuq stazzjonijiet sanzjonati ġie pprojbit ukoll.