L-iżgurar tal-implimentazzjoni tas-sanzjonijiet
L-implimentazzjoni effettiva u diliġenti tas-sanzjonijiet hija essenzjali biex jiġi żgurat li jintlaħqu l-objettivi tagħhom. Din hija primarjament ir-responsabbiltà tal-Istati Membri. Il-Kummissjoni taħdem mill-qrib biex tappoġġjahom f’din il-ħidma permezz ta’:
- laqgħa regolari tal-grupp ta’ esperti dwar l-implimentazzjoni tas-sanzjonijiet li tippermetti lill-Kummissjoni tilħaq lill-awtoritajiet rilevanti kollha tal-Istati Membri
- it-“Task Force Iffriżar u Sekwestru” stabbilita mill-Kummissjoni f’Marzu 2022, li tiżgura koordinazzjoni aħjar tal-iffriżar tal-assi kontra individwi u entitajiet Russi u Belarussi
- Grupp ta’ Livell Għoli, ippresedut mill-Kummissarju Mairead McGuinness, li jippermetti lis-27 awtorità tal-Istati Membri jaqsmu l-informazzjoni – flimkien mar-rappreżentanti tal-industrija u n-negozji tal-UE
- laqgħat ad hoc tal-partijiet ikkonċernati li saru mill-Kummissjoni li jipprovdu gwida u jiddiskutu l-implimentazzjoni tas-sanzjonijiet mal-operaturi
L-UE qed tikkoordina s-sanzjonijiet tagħha ma’ alleati u sħab internazzjonali ewlenin oħra bħall-Istati Uniti, ir-Renju Unit, il-Korea t’Isfel, l-Iżvizzera, il-Ġappun, l-Awstralja, il-Kanada, New Zealand u n-Norveġja, sabiex kull pajjiż juża l-aktar miżuri effettivi bbażati fuq l-ekonomija tagħhom.
Il-prevenzjoni taċ-ċirkomvenzjoni
Iċ-ċirkomvenzjoni tas-sanzjonijiet tal-UE hija reat. Biex timmonitorja dan, il-Kummissjoni qed:
- timmobilizza s-servizzi kummerċjali u doganali tagħha biex tidentifika d-direzzjoni mill-ġdid tal-flussi kummerċjali minn ċerti pajjiżi terzi li jaġixxu bħala gateways possibbli lejn ir-Russja
- tikkuntattja pajjiżi terzi biex jintlaħaq qbil dwar valutazzjoni kondiviża, titqabbel id-data u jiġu diskussi miżuri ta’ rimedju kif xieraq
- tiġbor informazzjoni dwar xejriet ta’ ċirkomvenzjoni mis-settur privat, kif ukoll rakkomandazzjonijiet dwar kif jista’ jiġi evitat aħjar dan il-fenomenu.
Bħala parti mill-11-il pakkett ta’ sanzjonijiet adottat fit-23 ta’ Ġunju, l-UE introduċiet strument ġdid biex tevita ċ-ċirkomvenzjoni tagħhom permezz tal-ġurisdizzjonijiet ta’ pajjiżi terzi. L-istrument jiffoka fuq oġġetti speċifiċi b’riskju għoli li huma ppruvati li jaslu fir-Russja permezz ta’ pajjiżi terzi, minkejja li huma koperti mis-sanzjonijiet tal-UE. L-istrument jgħammar lill-UE biex tipprojbixxi l-esportazzjoni ta’ dawn l-oġġetti lejn il-pajjiżi li jintużaw biex jiġu evitati s-sanzjonijiet tagħna, u wkoll biex tipprojbixxi l-forniment ta’ servizzi assoċjati.
Il-lista ta’ oġġetti u teknoloġija soġġetti għal din il-miżura se timtela biss jekk ma tkun tista’ tinstab l-ebda soluzzjoni oħra. Dan ifisser impenn u djalogu mill-qrib ma’ kull wieħed mill-pajjiżi terzi kkonċernati. Aħna dejjem se nagħtu opportunità lill-awtoritajiet biex jirreaġixxu għas-sejbiet u l-konklużjonijiet tal-UE. Għalhekk din hija miżura tal-aħħar istanza.
Għadd ta’ miżuri oħra ppermettewlna nrażżnu aktar iċ-ċirkomvenzjoni tas-sanzjonijiet:
Introduċejna projbizzjoni fuq it-tranżitu għal oġġetti b’użu doppju u teknoloġija avvanzata, armi tan-nar u materjali marbuta mal-avjazzjoni mit-territorju Russu. Dan ifisser li l-oġġetti ma jistgħux jibqgħu jgħaddu mit-territorju tar-Russja meta jiġu esportati lejn pajjiżi terzi.
Għamilna wkoll obbligatorju għall-operaturi li jipprojbixxu kuntrattwalment l-esportazzjoni mill-ġdid ta’ dawn l-oġġetti sensittivi lejn ir-Russja.
Introduċejna projbizzjoni ta’ tranżitu għal ċerti oġġetti ekonomikament kritiċi mit-territorju Russu. Dan ifisser li dawn l-oġġetti ma jistgħux jibqgħu jgħaddu mit-territorju tar-Russja meta jiġu esportati lejn pajjiżi terzi.
Introduċejna miżura ġdida li se teħtieġ l-entitajiet tal-UE jirrapurtaw ċerti trasferimenti ta’ fondi barra mill-UE minn entitajiet tal-UE bi sjieda diretta jew indiretta Russa ogħla minn 40 %, jew entitajiet stabbiliti fir-Russja.
Flimkien mal-Istati Membri, il-Kummissjoni se tistabbilixxi ħarsa ġenerali lejn l-assi ffriżati kollha tal-Bank Ċentrali Russu miżmuma fl-UE, biex tkun taf fejn jinsabu u kemm jiswew. Dan huwa partikolarment importanti fir-rigward tal-użu possibbli ta’ assi pubbliċi Russi għall-finanzjament tar-rikostruzzjoni tal-Ukrajna.
L-Istati Membri rrappurtaw lill-Kummissjoni aktar minn €200 biljun ta’ assi mmobilizzati tal-Bank Ċentrali Russu taħt l-10 pakkett ta’ sanzjonijiet.
Għall-ewwel darba, l-UE teħtieġ li l-persuni elenkati jiżvelaw b’mod attiv l-assi kollha tagħhom fil-ġuriżdizzjoni tal-UE lill-awtorità nazzjonali kompetenti. Dan se jgħin biex jiġi żgurat li l-assi jiġu traċċati u ffriżati b’mod ħafna aktar effettiv. In-nuqqas ta’ konformità ma’ dan l-obbligu - jiġifieri n-nuqqas ta’ rappurtar minn dawk imniżżlin fuq il-listi - se jiġi ttrattat bħala ksur tal-liġi tas-sanzjonijiet tal-UE, bil-konsegwenzi li jsegwu skont il-leġiżlazzjoni nazzjonali ta’ kull Stat Membru, inklużi dawk kriminali.
Dan huwa b’reazzjoni għall-kumplessità dejjem tikber tal-iskemi ta’ evażjoni tas-sanzjonijiet: jeħtieġ li nibqgħu pass ’il quddiem minn dawn it-tentattivi.
It-12-il pakkett ta’ sanzjonijiet, imħabbar fit-18 ta’ Diċembru 2023, jintroduċi obbligu aktar strett għall-Istati Membri biex jittraċċaw b’mod proattiv l-assi tal-persuni elenkati sabiex jipprevjenu u jidentifikaw każijiet ta’ ksur jew ċirkomvenzjoni tas-sanzjonijiet.
L-UE introduċiet kriterju ġdid ta’ elenkar, li se jippermettilha tissanzjona persuni li jiffaċilitaw iċ-ċirkomvenzjoni tas-sanzjonijiet.
Barra minn hekk, se jkun possibbli li l-persuni deċeduti jinżammu fuq il-lista tal-iffriżar tal-assi, sabiex jiġi evitat li l-miżura ta’ ffriżar potenzjalment tiġi mminata.
Fit-2 ta’ Diċembru 2022, il-Kummissjoni ressqet proposta biex tarmonizza r-reati kriminali u l-pieni għall-ksur tal-miżuri restrittivi tal-UE. Filwaqt li l-aggressjoni Russa fuq l-Ukrajna għadha għaddejja, huwa ta’ importanza kbira li l-miżuri restrittivi tal-UE jiġu implimentati bis-sħiħ u l-ksur ta’ dawk il-miżuri ma jiġix ippremjat. Il-proposta tal-Kummissjoni tistabbilixxi regoli komuni tal-UE, li se jagħmluha aktar faċli biex jiġi investigat, imħarrek u kkastigat il-ksur ta’ miżuri restrittivi fl-Istati Membri kollha bl-istess mod.
Il-Kummissjoni ħolqot rwol ġdid ta’ Mibgħut Speċjali Internazzjonali għall-Implimentazzjoni tas-Sanzjonijiet tal-UE biex tiżgura diskussjonijiet kontinwi u ta’ livell għoli ma’ pajjiżi terzi biex jiġu evitati l-evażjoni u ċ-ċirkomvenzjoni tas-sanzjonijiet li ġew imposti fuq ir-Russja mill-bidu tal-gwerra tagħha kontra l-Ukrajna. David O’Sullivan, eks-Segretarju Ġenerali tal-Kummissjoni u diplomatiku għoli tal-UE, inħatar bħala Mibgħut tas-Sanzjonijiet tal-UE u ħa dan ir-rwol f’Jannar 2023.
Informazzjoni għall-partijiet ikkonċernati
Biex tiżgura li l-informazzjoni tkun disponibbli għall-partijiet ikkonċernati, il-Kummissjoni
- ippubblikat mijiet ta’ FAQs li jappartjenu għas-setturi kollha tal-industrija affettwati mis-sanzjonijiet, bħall-finanzi u l-banek, il-kummerċ u d-dwana, l-enerġija, l-agrikoltura, it-trasport, l-akkwist pubbliku tal-media, u ħarġet gwida speċifika dwar kwistjonijiet umanitarji. Kellha djalogi regolari mal-partijiet ikkonċernati tal-industrija u qed taħdem flimkien mal-awtoritajiet nazzjonali kompetenti li huma kompetenti biex jimplimentaw is-sanzjonijiet tal-UE, jagħtu awtorizzazzjonijiet u jħarrku l-ksur.
- ippubblikat informazzjoni faċilment aċċessibbli dwar il-pakketti adottati s’issa. Il-Mappa tas-Sanzjonijiet tal-UE tipprovdi viżwalizzazzjoni faċli għall-utent tar-reġimi kollha tas-sanzjonijiet attwalment fis-seħħ, inklużi persuni soġġetti għal sanzjonijiet individwali. Il-Lista Konsolidata ta’ Sanzjonijiet Finanzjarji, li tinkludi l-persuni, il-gruppi u l-entitajiet kollha soġġetti, taħt is-sanzjonijiet tal-UE, għal iffriżar tal-assi u l-projbizzjoni li l-fondi u r-riżorsi ekonomiċi jsiru disponibbli hija disponibbli online.
- stabbiliet Għodda għall-Informaturi biex tirrapporta l-ksur tas-sanzjonijiet b’mod anonimu. Is-sanzjonijiet tal-UE issa jirrikjedu wkoll li l-Istati Membri jikkriminalizzaw il-ksur tas-sanzjonijiet.
- stabbiliet il-punt ta’ kuntatt fil-livell tal-UE għall-għajnuna umanitarja, li jipprovdi informazzjoni prattika lill-operaturi umanitarji dwar it-talba għal derogi umanitarji skont is-sanzjonijiet tal-UE.
- nediet/ħolqot punt ta’ kuntatt ċentrali biex jgħin lill-awtoritajiet u l-operaturi mhux tal-UE dwar il-kamp ta’ applikazzjoni u l-implimentazzjoni tas-sanzjonijiet tal-UE kontra r-Russja - u speċjalment dwar kwistjonijiet relatati mas-sigurtà tal-ikel. Dan huwa maħsub ukoll biex jiżgura li l-fluss ta’ prodotti agroalimentari u fertilizzanti lejn il-pajjiżi tagħhom ma jiġix affettwat.